Arrestohet 42-vjeçari në Librazhd, qëlloi me armë gjahu në ajër pas një konflikti për pronësinë
Një ngjarje e rrezikshme u parandalua në kohë nga Policia në fshatin Gizavesht të Librazhdit, ku një 42-vjeçar u arrestua në flagrancë pasi qëlloi me armë gjahu në ajër për të kanosur fqinjin e tij, pas një konflikti për motive pronësie.
Menjëherë pas njoftimit, shërbimet e Komisariatit të Policisë Librazhd shkuan në vendngjarje dhe ndërhynë duke shmangur një situatë që mund të përshkallëzonte në një krim. Si rezultat, u kap dhe u vu në pranga shtetasi S. Xh., 42 vjeç.
Sipas hetimeve paraprake, konflikti kishte ndodhur mes tij dhe fqinjit të tij, 80-vjeçarit H. Xh., dhe gjatë debatit, S. Xh. kishte qëlluar në ajër me një armë gjahu, që e mbante pa leje, për ta frikësuar atë. Fatmirësisht, nga të shtënat nuk pati persona të lënduar.
Policia sekuestroi armën e gjahut dhe një sasi municioni luftarak, ndërsa materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.
